मरद (Marad)

    

   भोजपुरी कविता " मरद"

ना घर मे गरज बा, ना बाहर मे गरज बा
मरद हई बस, मरद, भइल हि हरज बा

कबो मेहरी के गहना, कबो चउका के लहना
कबो लइकन के कहना, कबो सबके खेलवना

हई सबके उधारी, केहू कुछ ला पुकारी
हम सबके करज हई, हा हम गरज हई

कबो केहू के गारी, कबो घर के तरकारी
कबो मतलब के इयारी, ना कह के बीमारी

हई आशा के गगरी, ई मतलब के नगरी
"ना" ला हरज हई, हा हम गरज हई

कबो बन के चिंगारी  फूटी हारी-हारी
कबो हक मे कटी अउर बटी बारी-बारी

हई सगरन के सगरी ना देले पे झगड़ी
हर दवा के मरऽज हई हा हम गरज हई

कबो बन के भिखारी भटकी मारी- मारी
कबो थक के जे हारी ना घर ना दुआरी

हऽ जिंदगी जुआरी खेले पारा-पारी
हा सबके फरज हई हा हम गरज हई

कबो हमही हई गारी कबो खुद के हि मारी
कबो केहू धुतकरी ना समझे लाचारी

कटी बारी बारी अउर टूटी तारी तारी
हम "ना" ला हरज हई हा बस गरज हई

                         उदय शंकर प्रसाद

प्रधानी ( pradhani )

      

      

       प्रधानी

आलू उठल प्रधानी मे
पहुंचल बात खेतानी मे
चारो ओर ई शोर भइल
डूबिहसन सब ई बारी मे

भंटा सुन ई काप रहल
गोभी भी उमीदवार रहल
गोभी कहलक का करी भाई
आपन कुर्सी कइसे बचाई

भंटा कहलक सुन बड़ भाई
जवन आफत तोहपे उ हमारो पे आइल
सोच सोच कवनो होये उपाए
तळेक ओहिझे परवल आइल

परवल सुन ई भइल भौचक्का
पर भीतर से रहे उ पक्का
आलू संघे खूब हमहू बेचाएम
दम बनेला हमही खोजाएम

परवल कहलक बड़ी दुख बा भाई
सूझे ना हमरा कवनो दवाई
जाई जाई तनी दउड़ल जाई
भिंडी रउआ के राह बताई

भिंडी बइठल बाजारी मे
सुन छाती पीटे लाचारी मे
करइला कह मुहखुड़िया ढीमलाइल
का आलू लड़ी अबकी बारी मे  ?

भइल मतदान खेतानी मे
तरकारीयन के निगरानी मे
आलू ढेर भोट से जीत गइल
तरकारीयन के मित भइल
               

                  उदय शंकर प्रसाद

हम

                   हम

हम इहवा धूल बानी धूल निहर घूम लेम
आज इहवा काल उहवा झूम सकी तऽ झूम लेम     
का मालुम आज दिन बा काल सूरज डूब जाई
जे मिली राह चलते हाथ ओके चूम लेम

ना घमंड ना जलन ना केहू के किरकिराएम
जे मिली जहवा मिली बस थोड़ा सा मुस्कुराएम
हो सकी सहयोग तऽ सहयोग थोड़ा कर पाएम
अउर ना तऽ सर झुकाएम अउर आगे बढ़ जाएम

ना कुछु के आश रहे ना कुछु के प्यास बा
मन हमर बा हर्फ़न मौला ना हमर कुछ खास बा
एक पल के जिंदगी मे मुस्कुराई अउर मुस्कुराई
पीठ पे जाई अगर तऽ याद आई बस याद आई ।

                  उदय शंकर प्रसाद